荷蘭租屋事件薄
（四）三個HR「group interview」
有一次，搵到一間屋，入邊本身已經有三個女孩子住緊。同之前嘅個案一樣，其中一個住客要離開荷蘭，所以就騰出左一間房出嚟。
由於地理位置良好，裝修尚算新淨，而且租金唔貴，自然有好多人對呢一個單位有興趣，結果有超過300個人send request。
呢三個女仔，全部都係做HR。而佢哋揀室友嘅方法亦都非常特別，就係先篩選左一大班「有潛質」嘅「候選人」，然後安排分輪「Group interview」。
呢一次經驗令我聯想起啲咩呢？就係讀大學嘅時候late come 住hall，一大班人爭一個床位。每個人都想盡法寶，想令到見你嘅人對你有個好印象，從而比呢一個床位你。（咁當然，住得hall嘅，就唔似係得個住字啦！尤其是如果你好似我咁，係來自薄扶林大學嘅，就會明白除咗住，你仲有其他責任嘅⋯^_^）
真心，冇諗過走到去歐洲都要面對呢一樣嘢。
咁喺呢一啲面試入面，都係離唔開各個「候選人」自我介紹，講一下平時生活習慣、有咩興趣、做邊一行同工作時間等等。
呢三個女仔都幾友善。
佢哋都會講一講大家平日鍾意做啲乜嘢等等。不過最有趣嘅係，呢一間屋有個特別嘅規矩。就係喺個廳度會有一個大月曆，如果你唔返屋企瞓要提早Mark低。
驟眼咁講，好似冇咩特別。但係認真諗一諗，有少少似同屋企人住，唔返屋企要提早同屋企人講咁。不過，最後佢哋冇揀到我。所以呢，呢一個都係唔需要由我嚟擔心嘅問題啦，哈哈！
#移民 #移民歐洲 #移民荷蘭 #荷蘭 #西歐 #出國 #留學 #歐洲讀書 #歐洲工作 #歐洲生活 #荷蘭公司 #歐洲公司 #荷蘭生活知多啲 #香港人在荷蘭 #香港人在歐洲 #香港人加油 #搵工 #搵屋 #租屋 #租樓 #租房
Search